ខេត្តស្វាយរៀង៖ក្នុងពិធីបើកវគ្គបណ្តុះបណ្តាលស្តីពីការអនុវត្តកម្មវិធី និងការឧបត្ថម្ភអត្រាថ្មី សម្រាប់កម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម ០២ឆ្នាំ នៅបរិវេណសាលប្រជុំអាគារ (ឃ) នៃសាលាខេត្តស្វាយរៀង នាថ្ងៃទី២៥ ខែកក្កដា ឆ្នាំ២០២៣នេះ លោក តូច ប៉ូលីវ៉ា អភិបាលរងខេត្តស្វាយរៀង បានថ្លែងអំណរគុណ ចំពោះមូលនិធិជាតិជំនួយសង្គម ដែលបានផ្តល់ជាបច្ចេកទេស និងថវិកាដើម្បីរៀបចំវគ្គបណ្តុះបណ្តាលរបស់យើងនាពេលនេះ ដែលសរបញ្ជាក់ឲ្យយើងឃើញពីភាពសកម្ម និងការប្តេជ្ញាចិត្តខ្ពស់របស់អង្គភាពប្រតិបត្តិករមួយនេះ ក្នុងការអនុវត្តនូវកម្មវិធីជាតិជំនួយសង្គមនានាប្រកបដោយប្រសិទ្ធិភាពខ្ពស់ ឆ្លើបតបទៅនឹងបញ្ហាប្រឈម ដែលរាជរដ្ឋាភិបាលបានដាក់ចេញនូវវិធានការ អន្តរាគមន៍ គាំពារ សង្គមតាមរយៈកម្មវិធីជាតិជំនួយសង្គម ។
ជាមួយគ្នានេះដែរ លោកបន្តថា រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានដាក់ឱ្យអនុវត្ដយុទ្ធសាស្រ្ដចតុកោណ ដំណាក់កាលទី៤ ក្នុងគោលដៅជាយុទ្ធសាស្រ្ដ គឺសំដៅលើកកម្ពស់សុខភាពប្រជាជន និងអាហារូបត្ថម្ភ ដើម្បីគាំទ្រដល់ការអភិវឌ្ឍធនធានមនុស្ស កំណើនសេដ្ឋកិច្ច និងវឌ្ឍភាពសង្គម ប្រកបដោយចីរភាព ។ ជាលទ្ធផល រាជរដ្ឋាភិបាលសម្រេចបានគោលដៅអភិវឌ្ឍសហស្សវត្ស ក្នុងការកាត់បន្ថយមរណភាព មាតា ទារក និងកុមារ កាត់បន្ថយការឈឺ និងស្លាប់ដោយសារជំងឺឆ្លង ដូចជា ជំងឺអេដស៍ គ្រុនចាញ់ របេង និងបានលុបបំបាត់ជំងឺគ្រុនចាញ់ទាំងស្រុងនៅ ឆ្នាំ២០១៦ ជាដើម ៕
