(ភ្នំពេញ)៖នៅព្រឹកថ្ងៃទី០៦ ខែសីហា ឆ្នាំ២០២៣ នេះឯកឧត្តម ដួង តារា រដ្ឋលេខាធិការទ្រឹស្ដីការគណៈរដ្ឋមន្ត្រី និងជាជំនួយការផ្ទាល់សម្ដេចតេជោនាយករដ្ឋមន្ត្រី បានជួបប្រជុំពិភាក្សាជាមួយវិនិយោគិនចិន របស់ក្រុមហ៊ុន Danong Development Group នាការិយាល័យស្ថិតក្នុងគេហដ្ឋានរបស់ឯកឧត្តមផ្ទាល់ ក្នុងក្រុងអរិយក្សត្រ។
ជំនួបប្រជុំនេះមានការចូលរួមពីលោក ZHAO SHU JIG ជាប្រធានក្រុមហ៊ុន Danong រួមទាំងអ្នកជំនាញផ្នែកកសិកម្មមកពីប្រទេសចិន និង ក្រុមហ៊ុនជាដៃគូ ដែលមានជំនាញលើវិស័យកសិកម្ម និងមានបទពិសោធន៍ ច្បាស់លាស់លើវិស័យកសិកម្មដែលនឹងគ្រោងធ្វើការវិនិយោគនៅកម្ពុជាក្នុងពេលដ៏ឆាប់ខាងមុខនេះ។
ប្រធានបទក្នុងកិច្ចប្រជុំពិភាក្សានេះគឺផ្ដោតទៅលើគម្រោងវិនិយោគលើវិស័យកសិឧស្សាហកម្ម របស់ក្រុមហ៊ុន Danong មកកាន់ប្រទេសកម្ពុជា ដែលក្រុមហ៊ុនត្រូវការដីជាច្រើនពាន់ហិកតា ទៅលើខេត្តដែលមានសក្តានុពលផ្នែកកសិកម្ម ដែលគ្រោងទុនវិនិយោគដ៏ច្រើនផងដែរ ។ ដំណាំ និងផ្នែកកសិកម្មដែលក្រុមហ៊ុនត្រូវការវិនិយោគ មានដូចជា ដំណាំស្រូវ,ដំណាំពោត,ស្វាយចន្ទី,ស្វាយ, ចិញ្ចឹមគោ, ដំណាំស្មៅចំនីគោ រួមទាំងដំណាំផ្សេងៗទៀត និងមានគម្រោងបង្កើតរោងចក្រផងដែរ។ ហើយក្រុមហ៊ុន គ្រោង នឹងចុះបញ្ជីនៅកម្ពុជា ដើម្បីមានសិទ្ធស្របច្បាប់ក្នុងការវិនិយោគ។
សូមរំលេចផងដែរថា គម្រោងវិនិយោគទៅលើវិស័យកសិកម្មឆ្លាតវៃ(Smart Agriculture) គឺជា បច្ចេកវិទ្យាទំនើប ដើម្បីធានាអោយបាននូវផលិតភាព និងទីផ្សារ រួមទាំងគ្មានផលប៉ះពាល់ដល់បរិស្ថាន។ ក្រុមហ៊ុន Danong បានវាយតម្លៃខ្ពស់លើកក្តាភូមិសាស្ត្រ អាកាសធាតុអំណោយផលល្អ និងជាប្រទេសដែលមានសក្តានុពលខ្ពស់លើវិស័យកសិកម្ម។ ហើយក្រុមហ៊ុនមាន គម្រោង ជំនុញវិស័យកសិកម្ម នៅកម្ពុជា ឲ្យមានការរីកចំរើនខ្លាំង រួមទាំងជំរុញការនាំចេញកសិផលរបស់កម្ពុជា ព្រោះប្រទេសចិន គឺជាប្រទេសជាដៃគូ សំខាន់ក្នុងការទទួលការនាំចេញពីកម្ពុជា។
ហើយគម្រោងនេះនឹងជួយឱ្យកំណើនសេដ្ឋកិច្ចក្នុងប្រទេសកម្ពុជាមានការកើនឡើងដោយផ្ដល់ការងារ និងប្រាក់ចំណូលដល់ប្រជាពលរដ្ឋព្រោះដំណាក់កាលរបស់គម្រោងចាប់ផ្តើមពីការដាំដុះ ប្រមូលទិញ បង្កើតរោងចក្រ និងនាំចេញ។បន្ទាប់ពីបានស្តាប់ពីគម្រោងរបស់ក្រុមហ៊ុន Danong ឯកឧត្តម ដួង តារា ពិតជាសប្បាយរីករាយ និងគាំទ្រ ចំពោះចក្ខុវិស័យរបស់ក្រុមហ៊ុន ដែលនឹងធ្វើការវិនិយោគនៅកម្ពុជា លើវិស័យកសិកម្មនេះ។ ហើយឯកឧត្តម បានរំលេចផងដែរអំពីទំនាក់ទំនង រវាងកម្ពុជា និងចិន គឺជាមិត្តដែកថែប ហើយឯកឧត្តមរំពឹងទុកថា គម្រោង នេះគឺពិតជាជួយដល់សេដ្ឋកិច្ចកម្ពុជា និងជាពិសសេសផ្នែកកសិកម្ម។
សូមបញ្ជាក់ផងដែរថា តំណាងក្រុមហ៊ុន Danong មកកម្ពុជានេះមានរយៈពេលជាង១០ថ្ងៃ ដើម្បីជួបជាមួយក្រសួងជំនាញពាក់ព័ន្ធ និងសិក្សាពីភូមិសាស្ត្រ ទៅតាមបណ្តាខេត្តនានា ក្នុងគម្រោងវិនិយោគលើវិស័យកសិកម្មនេះ។ បន្ទាប់ពីបានសិក្សា ក្រុមហ៊ុននឹងរៀបចំផែនការមេ(Master Plan) និងរៀបចំចុះបញ្ជី រួមទាំងលក្ខណ្ឌក្នុងការវិនិយោគស្របច្បាប់នៅកម្ពុជា។ ហើយនៅថ្ងៃទី០៧ ស្អែកនេះ ក្រុមវិនិយោគក្រុមហ៊ុន Danong នឹងជួបប្រជុំជាមួយឯកឧត្តម អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទជាថ្មីម្តងទៀតក្នុងគម្រោងវិនិយោគនេះ៕
