បើកការប្រកួតកីឡាបាល់ទាត់ពានរង្វាន់ ”ឯកឧត្តម គង់ សោភ័ណ្ឌ – Kong Sophorn Cup” និងព្រឹត្តិការណ៍សម្ដែងកីឡាមិត្តភាពគាំទ្រយុទ្ធនាការ Beyond the Games ក្រោមមូលបទ ”បេះដូងលោតក្នុងចង្វាក់តែមួយ”
ខេត្តកណ្ដាល៖ឯកឧត្តម គង់ សោភ័ណ្ឌ អភិបាលនៃគណ: អភិបាលខេត្តកណ្ដាល និងជាប្រធានសហភាពសហព័ន្ធយុវជនកម្ពុជាខេត្តកណ្ដាល នៅព្រឹក ថ្ងៃទី០៣ ខែមីនា ឆ្នាំ២០២៣ អញ្ជើញជាអធិបតីភាព ក្នុងពិធីបើកការប្រកួតកីឡាបាល់ទាត់ពានរង្វាន់ ឯកឧត្តម គង់ សោភ័ណ្ឌ ” Kong Sophorn Cup” លើកទី២ ឆ្នាំ២០២៣ និងពិធីសម្ដែងកីឡាមិត្តភាព គាំទ្រយុទ្ធនាការ “Bayond The Games” ក្រោមមូលបទ” បេះដូងលោតក្នុងចង្វាក់តែមួយ“ប្រចាំខេត្តកណ្ដាល នៅពហុកីឡាដ្ឋានខេត្តកណ្ដាល។“កីឡារស់ ក្នុងសន្តិភាព” សូមជម្រាបថា៖ ព្រឹត្តិការណ៍កីឡាបាល់ទាត់ និងការសម្តែងកីឡាមិត្តភាពគាំទ្រយុទ្ធនាការ Beyond The Games ដែលបានប្រព្រឹត្តិយ៉ាងអធិកអធមនាឱកាសនេះ គឺដើម្បីអបអរសាទរក្នុងការត្រៀម ឆ្ពោះទៅកាន់ព្រឹត្តិការណ៍ជាប្រវត្តិសាស្រ្ត ដែលទង់ជាតិកម្ពុជានឹងអណ្តែតឡើងប្រកប ដោយមោទកភាព ក្នុងនាមជាប្រជាជាតិ ដែលមានអរិយធម៌ វប្បធម៌ ដ៏ល្បីរន្ទឺ និងចំណាស់ មួយក្នុងសកលលោក ដែលនៅសល់តែ ៦៣ថ្ងៃ ទៀតប៉ុណ្ណោះ កម្ពុជានឹងធ្វើជាម្ចាស់ផ្ទះរៀបចំការប្រកួតកីឡាស៊ីហ្គេម ( SEA Games ) និងអាស៊ានប៉ារ៉ាហ្គេម (ASEAN Para Games) ដែលជាការប្រកួតកម្រិតអន្តរជាតិ ដ៏ធំនៅក្នុងព្រះរាជាណាចក្រកម្ពុជា ហើយនេះគឺជាកិត្តិយសជាប្រវត្តិសាស្រ្តមួយទៀត ក្នុងវិស័យកីឡាដែលកម្ពុជារង់ចាំធ្វើជាម្ចាស់ផ្ទះអស់រយៈពេល ៦៤ ឆ្នាំមកហើយ៕
