ព័ត៌មានជាតិ

សមត្ថកិច្ចចម្រុះចុះបង្ក្រាបការនាំចូល និងចែកចាយទឹកដោះគោ Dutchmill ដែលរំលោភសិទ្ធិចែកចាយផ្តាច់មុខ និងខូចគុណភាព

(ភ្នំពេញ)៖ក្រោយពីទទួលបានពាក្យបណ្តឹងពីក្រុមហ៊ុន យូអិនធី ហូលសេល ខូអិលធីឌី កម្លាំងនាយកដ្ឋាននគរបាលប្រឆាំងបទល្មើសសេដ្ឋកិច្ច នៃអគ្គស្នងការដ្ឋាននគរបាលជាតិ អាជ្ញាធរមូលដ្ឋាន និងតំណាងក្រុមហ៊ុន ក្រោមការដឹកនាំសម្របសម្រួលនីតិវិធីផ្ទាល់ពីលោក សាយ ណូរ៉ា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញនៅថ្ងៃទី១៤ ខែធ្នូ ឆ្នាំ២០២២ បានចុះប្រតិបត្តិការបង្ក្រាបការនាំចូល និងចែកចាយទឹកដោះគោ Dutchmill ដែលត្រូវបានលួចនាំចូលដោយរំលោភកម្មសិទ្ធិបញ្ញា និងខូចគុណភាព ជាច្រើនពាន់ដប ។

 

បើតាមសមត្ថកិច្ចបានឲ្យដឹងថា ក្នុងប្រតិបត្តិការនេះ កម្លាំងជំនាញបានចុះឆែកឆេរ២ទីតាំងផ្សេងគ្នា ដោយទីតាំងទី១៖ ស្ថិតនៅផ្ទះលេខ២៦ ផ្លូវ១៣B (បុរីពិភពថ្មីកំបូលIII) សង្កាត់កន្ទោក ខណ្ឌកំបូល ដកហូតបានទឹកដោះគោម៉ាក Dutchmill ខុសច្បាប់ចំនួន ៦,៥០០ដប ស្មើនឹង ២,៥០៧គីឡូក្រាម និងទីតាំងទីពីរស្ថិតនៅផ្ទះលេខ C៧០ ផ្លូវបេតុង សង្កាត់រលួស ខណ្ឌដង្កោ ដកហូតបានទឹកដោះគោម៉ាក Dutchmill ខុសច្បាប់ចំនួន៥៤២ដប ស្មើនឹង ៣២៣គីឡូក្រាម។

 

ក្រោយពីធ្វើការត្រួតពិនិត្យ ឃើញថាផលិតផលទឹកដោះគោទាំងអស់ពុំបានដឹកជញ្ជូន និងរក្សាទុកក្នុងសីតុណ្ហភាពតាមកម្រិតកំណត់ ដែលអាចនឹងខូចគុណភាព ព្រមទាំងរំលោភសិទ្ធិចែកចាយផ្តាច់មុខ របស់ក្រុមហ៊ុន UNT ដូចនេះលោកព្រះរាជអាជ្ញារង បានសម្រេចឲ្យសមត្ថកិច្ចធ្វើការដកហូតវត្ថុតាងទាំងអស់ យកមករក្សាទុកជាបណ្តោះអាសន្ន នៅនាយកដ្ឌាន និងតម្រូវឲ្យម្ចាស់ទីតាំងមកសាកសួរបំភ្លឺនៅនាយកដ្ឋាននគរបាលប្រឆាំងបទល្មើសសេដ្ឋកិច្ច ដើម្បីបន្តនីតិវិធី៕

Leave a Reply

Your email address will not be published.