ខេត្តព្រៃវែង៖ថ្លែងក្នុងកិច្ចប្រជុំ បូកសរុបលទ្ធផលសកម្មភាពការងារប្រចាំឆ្នាំ២០២២ និងលើកទិសដៅអនុវត្តបន្តឆ្នាំ២០២៣ និងពិធីប្រគល់–ទទួលថវិកាវិភាគទានសមាជិកភាព និងហឹបសង្គ្រោះសាខាកាកបាទក្រហមកម្ពុជា ខេត្តព្រៃវែង នៅថ្ងៃទី០៩ ខែធ្នូ ឆ្នាំ២០២២ ឯកឧត្តម ជា សុមេធី ប្រធានគណៈកម្មាធិការសាខាកាកបាទក្រហមកម្ពុជាខេត្ត បានមានប្រសាសន៍ថា គណៈកម្មាធិការសាខា និងអនុសាខាកាកបាទក្រហមកម្ពុជា ក្រុង ស្រុក ទាំងអស់នៃខេត្តព្រៃវែង ត្រូវចូលរួមពួតដៃគ្នាធ្វើការងារមនុស្សធម៌មួយនេះបន្ថែមទៀត សម្រាប់ធ្វើការឆ្លើយតបដល់បងប្អូនប្រជាពលរដ្ឋ ដែលគាត់ជួបរងគ្រោះដោយសារគ្រោះធម្មជាតិ និងគ្រោះមហន្តរាយផ្សេងៗទៅតាមមូលដ្ឋានរបស់ខ្លួន ឲ្យកាន់តែខ្លាំងឡើង។
ឯកឧត្តម ប្រធានគណៈកម្មាធិការ សាខា បានបន្ថែមទៀតថា ចំពោះការងារមនុស្សធម៌ ដោយបានការយកចិត្តទុកដាក់ខ្ពស់ពីសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ រួមជាមួយនឹងឯកឧត្តមនាយឧត្តមសេនីយ៍ សន្តិបណ្ឌិត នេត សាវឿន ប្រធានកិត្តិយសសាខាកាកបាទក្រហមកម្ពុជាខេត្ត ក៏ដូចជាអនុសាខាកាកបាទក្រហមម្ពុជា ក្រុង ស្រុក ទាំងអស់ គឺបាននឹងខិតខំយកចិត្តទុកដាក់យ៉ាងខ្លាំងក្នុងការចុះជួយដល់បងប្អូនប្រជាពលរដ្ឋដែលគាត់ជួបទុក្ខលំបាក ជាវិសេស គ្រួសារ រងគ្រោះដោយសារគ្រោះធម្មជាតិ និងគ្រោះមហន្តរាយផ្សេងៗ ដល់បងប្អូនប្រជាពលរដ្ឋនៅតាមមូលដ្ឋាន ដើម្បីធ្វើការឆ្លើយតបនៅបញ្ហា ដែលគាត់ជួបប្រទះនោះបានទាន់ពេលវេលា។
ជាមួយគ្នានោះដែរឯកឧត្តម ក៏សូមកោតសរសើរនិងវាយតម្លៃខ្ពស់ ចំពោះការខិតខំប្រឹងប្រែងរបស់សាខាកាកបាទក្រហមកម្ពុជាខេត្ត អនុសាខា ក្រុង ស្រុក ក្រុមប្រតិបត្តិសាខា អ្នកស្ម័គ្រចិត្ត យុវជនកាកបាទក្រហមកម្ពុជា ទាំងអស់បានចូលរួម ពួតដៃគ្នា យ៉ាងសកម្មក្នុងការខិតខំប្រឹងប្រែងធ្វើការងារមនុស្សធម៌មួយនេះ បានទទួលជោគជ័យ ល្អប្រសើររយៈពេលកន្លងមកនេះ៕
