ខេត្តបាត់ដំបង៖បុរសម្នាក់ ត្រូវបានគេប្រទះឃើញដេកស្លាប់នៅក្នុងរថយន្តក្នុងទឹកអាងកំពីងពួយ នៅចំនុចក្រុម១៨ ស្ថិតនៅក្នុងភូមិតាង៉ែន ឃុំតាគ្រាម ស្រុកបាណន់ ខេត្តបាត់ដំបង បង្កការភ្ញាក់ផ្អើលនៅវេលាព្រឹកថ្ងៃទី២៧ ខែកញ្ញា ឆ្នាំ២០២២។
សមត្ថកិច្ចបានឲ្យដឹងថា សាកសពបុរសរងគ្រោះមានឈ្មោះ ហេង បណ្ឌិត អាយុ ២៨ឆ្នាំ រស់នៅភូមិចំការឬស្សី សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង ។សមត្ថកិច្ចបន្តថា នៅវេលាម៉ោងប្រហែល២២យប់ ជនរងគ្រោះខាងលើបានបើកបររថយន្តម៉ាក ISUZU.DMAXពណ៌ស ពាក់ផ្លាកលេខបាត់ដំបង 2G.9989 នៅតាមបណ្តោយផ្លូវខ្នងអាងកំពីងពួយ លុះមកដល់ចំណុចផ្លូវឡើងស្រែថ្មី ស្ថិតក្នុងភូមិតាង៉ែន ទំនងខ្វះការប្រុងប្រយ័ត្នក៏រ៉េចង្កូតជ្រុលទៅធ្លាក់ក្នុងអាងកំពីងពួយ បណ្ដាលឲ្យស្លាប់ក្នុងរថយន្តតែម្តង។
ក្រោយពេលកើតហេតុសមត្ថកិច្ចជំនាញ បានចុះទៅអន្តរាគមន៍លើកយករថយន្តឡើងគោក និងរំដោះសាកសពចេញពីរថយន្ត ដើម្បីពិនិត្យធ្វើកំណត់ហេតុ ប្រគល់ឲ្យសាច់ញាតិយកទៅរៀបចំធ្វើបុណ្យតាមប្រពៃណី៕
