ខេត្តក្រចេះ៖យ៉ាងហោចណាស់មានមនុស្សចំនួន៣នាក់រងរបួស និង១នាក់បានបាត់ខ្លួនក្នុងហេតុការណ៍គ្រោះថ្នាក់ដ៏រន្ធត់ កាលពីវេលាម៉ោង០០.៣០នាទី ថ្ងៃទី២៤ ខែសីហា ឆ្នាំ២០២២ ត្រង់ចំណុចទំនប់ទឹកបង្ហៀរ ថ្ពង ស្ថិតនៅភូមិថ្ពងឃុំស្នួល ស្រុកស្នួល ខេត្តក្រចេះ។
សមត្ថកិច្ចបានឱ្យដឹងថា ជនរងគ្រោះមានគ្នា០៤នាក់
១–ឈ្មោះ ឈួន រតនៈ ភេទប្រុស អាយុ៣០ឆ្នាំ រស់នៅភូមិក្បាលស្នួល ឃុំស្នួល ស្រុកស្នួល ខេត្តក្រចេះ(ជាអ្នកបើកបរ)រងរបួសស្រាល។
២–ឈ្មោះ ខឹម វីណា ភេទប្រុស អាយុ៣១ឆ្នាំ ជនជាតិខ្មែរ (ជាអ្នករួមដំណើរ)រងរបួសស្រាល។
៣-ឈ្មោះ អ៊ុច សុភា ភេទប្រុស អាយុ៣១ឆ្នាំ ជាអ្នករួមដំណើរ រងរបួសស្រាល។ ទាំង៣នាក់ខាងលើបានបញ្ជូនព្យាបាលនៅមន្ទីរពេទ្យបង្អែកស្រុកស្នួល។
៤-ឈ្មោះ ទិត្យ មេសា ភេទប្រុស អាយុ៣១ឆ្នាំ កំពុងបាត់ខ្លួនរកពុំទាន់ឃើញនៅឡើយ។
បើតាមសេចក្ដីរាយការណ៍បានឱ្យដឹងថា នៅមុនពេលកើតហេតុ ជនរងគ្រោះទាំង៤នាក់បានផឹកស្រានៅផ្ទះ លុះយប់បន្តិចក៏បែកគំនិតនាំគ្នាទៅច្រៀង KTV ដោយបើករថយន្តកាត់ទំនប់ទឹកបង្ហៀរ ថ្ពង ប៉ុន្តែទឹកមិនទាន់ហូរខ្លាំងទេ។ជាមួយគ្នានោះ ភ្លៀងបានបន្តធ្លាក់ឥតឈប់ បណ្ដាលឱ្យទឹកទំនប់បង្ហៀរ ថ្ពង ចាល់ឡើងនឹងហូរខ្លាំង នៅពេលជនរងគ្រោះចេញពីKTVនៅវេលាម៉ោងកើតហេតុ ជនរងគ្រោះបានបើករថយន្តចេញពី KTV ក្នុងបំណងមកផ្ទះរបស់ខ្លួន។លុះដល់ចំណុចកើតហេតុ ក៏ស្រាប់តែទឹកហូរប៉ើងរថយន្ត ធ្លាក់ពីលើទំនប់លិចបាត់តែម្ដង។ដោយក្នុងពេលនោះជនរងគ្រោះបីនាក់ បានដោះខ្លួនចេញរួច ខណៈម្នាក់ទៀតឈ្មោះ ទិត្យ មេសា លិចទៅជាមួយរថយន្ត។លុះដល់ព្រឹកឡើង សមត្ថកិច្ចពលរដ្ឋរួមនិងក្រុមគ្រួសារ រករថយន្តឃើញនិងស្ទូចឡើងគោកផងដែរ។ដោយឡែងជនរងគ្រោះឈ្មោះ ទិត្យ មេសា សមត្ថកិច្ចជំនាញនិងសាច់ញាតកំពុងស្វែងរកសព៕