កិច្ចប្រជុំផ្សាព្វផ្សាយ គោលការណ៍ណែនាំពាក់ព័ន្ធនានា ក្នុងការប្រយុទ្ធប្រឆាំងគ្រឿងញៀន
ខេត្តកណ្ដាល៖ក្នុងកិច្ចប្រជុំផ្សាព្វផ្សាយ គោលការណ៍ណែនាំពាក់ព័ន្ធនានា និងស្តាប់របាយការណ៍ស្តីពី វឌ្ឍនភាពក្នុងការប្រយុទ្ធប្រឆាំងគ្រឿងញៀន នៅព្រឹកថ្ងៃទី១៣ ខែវិច្ឆិកា ឆ្នាំ២០២៣ នៅសាលាខេត្តកណ្ដាល ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន បានធ្វើការណែនាំដល់មន្រ្តីអនុវត្តច្បាប់គ្រឿងញៀនទាំងអស់ ត្រូវបន្តយកចិត្តទុកដាក់បន្ថែម លើការងារតាមដានស្រាវជ្រាវ និងបង្រ្កាបបទល្មើសទាក់ទងនឹងគ្រឿងញៀន ជាពិសេស ការទប់ស្កាត់ការបង្វែរសារធាតុគីមីផ្សំពីជំនួញស្របច្បាប់ យកទៅកែច្នៃផលិតគ្រឿងញៀនខុសច្បាប់ពីព្រោះបញ្ហាគ្រឿងញៀន ត្រូវបានរាជរដ្ឋាភិបាលអាណត្តិទី៧ ចាត់ទុកស្មើនឹងបញ្ហាសន្តិសុខជាតិ។ ដូច្នេះគ្រប់ភាគីពាក់ព័ន្ធទាំងអស់ ចាប់ពីពេលនេះតទៅ ត្រូវរួមគ្នាទប់ស្កាត់ និងលុបបំបាត់ឲ្យខាងតែបាន។
ឯកឧត្តម នាយឧត្តមសេនីយ៍ បានបញ្ហាក់ថា ដើម្បីឈានទៅរកវិធានការដោះស្រាយទាន់ពេលវេលា និងមានប្រសិទ្ធភាព កងកម្លាំងមានអត្ថកិច្ច និងប្រជាពលដ្ឋតាមមូលដ្ឋាន ត្រូវអនុវត្តពាក្យស្លោក «៣កុំ ១រាយការណ៍» មានន័យថា កុំពាក់ព័ន្ធ, កុំអន្ដរាគមន៍, កុំលើកលែង។ ចំណែកមួយរាយការណ៍ មានន័យថា ផ្ដល់ព័ត៌មានដល់សមត្ថកិច្ចអំពីមុខសញ្ញាជួញដូរ ចែកចាយ ប្រើប្រាស់ ទីតាំងកែច្នៃ ផលិត និងទីតាំងស្ដុកទុកគ្រឿងញៀនទៅកាន់សមត្ថកិច្ច។
ក្នុងនោះឯកឧត្តម នាយឧត្តមសេនីយ៍ ក៏បានប្រកាសឲ្យដឹងពីទិសដៅការងារអាទិភាព ចំនួន ៥ចំណុច ដែលត្រូវបានដាក់ចេញដោយឯកឧត្តម នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀនផងដែរ រួមមាន៖ ទី១៖ កិច្ចការងារអប់រំផ្សព្វផ្សាយ ដោយត្រូវធ្វើយ៉ាងណាឲ្យកាន់តែទូលំទូលាយ ។
ទី២៖ ការត្រួតពិនិត្យសារធាតុគីមីផ្សំ ដោយត្រូវរៀបចំជាបន្ទាន់នូវយន្ដការគ្រប់គ្រងសារធាតុគីមីផ្សំឲ្យបានច្បាស់លាស់។
ទី៣៖ បន្ដខិតខំយកចិត្តទុកដាក់ទប់ស្កាត់ការហូរចូលគ្រឿងញៀនមកប្រទេសកម្ពុជា ។
ទី៤៖ បន្ដខិតខំទប់ស្កាត់ការកែច្នៃផលិតគ្រឿងញៀន និងទី៥៖ ខិតខំប្រឹងប្រែងលុបបំបាត់ ចែកចាយប្រើប្រាស់គ្រឿងញៀនតាមទីតាំងសប្បាយដ្ឋាន ដូចជា ខារ៉ាអូខេ ក្លឹបកម្សាន្ដ បៀរហ្គាឌិនជាដើម។
ថ្លែងក្នុងកិច្ចប្រជុំនេះដែរលោក ណុប ដារ៉ា អភិបានរងខេត្តបានបញ្ចាក់ថា ការងារប្រយុទ្ធប្រឆាំងគ្រឿងញៀន ជាការងារអាទិភាពបំផុត របស់រដ្ឋបាលខេត្ត ជាក់ស្តែងរដ្ឋបាលខេត្ត បានខិតខំ ចូលរួមសហការ និងកសាងនូវមជ្ឈមណ្ឌលព្យាបាល ស្តារនីតិសម្បទានគ្រឿងញៀន ដែលមជ្ឈមណ្ឌលនេះ ដើរតួយ៉ាងសំខាន់ លើការងារប្រយុទ្ធប្រឆាំងគ្រឿងញៀន និងការងារព្យាបាល អប់រំ ស្តារនីតិសម្បទា បណ្តុះបណ្តាលវិជ្ជាជីវៈ និងធ្វើសមាហរណកម្មអ្នកជាសះស្បើយពីគ្រឿងញៀន ចូលទៅក្នុងសហគមន៍ និងក្រុមគ្រួសារវិញ។ បច្ចុប្បន្នខេត្តមានមជ្ឈមណ្ឌលជាតិ ព្យាបាល និងស្តារនីតិសម្បទាអ្នកញៀនគ្រឿងញៀន ស្ថិតនៅភូមិបារគូ ឃុំបារគូ ស្រុកកណ្តាលស្ទឹង ចំនួន ១កន្លែង ដែលត្រូវបានដាក់សម្ពោធឲ្យប្រើប្រាស់ជា ផ្លូវការកាលពីខែមករា ឆ្នាំ២០១៨។ ជាមួយគ្នានេះ បានបញ្ចប់គម្រោងសាងសង់មជ្ឈមណ្ឌលព្យាបាល និង ស្តារនីតិសម្បទាអ្នកញៀនគ្រឿងញៀនខេត្តកណ្ដាល ១កន្លែងទៀត ស្ថិតក្នុងភូមិទួលសុភី ឃុំព្រែកគយ ស្រុកស្អាង ដែលគ្រោងនឹងសម្ពោធដាក់ឲ្យដំណើរការនាពេលឆាប់ៗខាងមុខនេះ៕
