ខេត្តព្រះសីហនុ៖ឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ ថ្លែងក្នុងឱកាស អញ្ជើញសំណេះសំណាលជាមួយមន្ត្រីបោសសម្អាតមីន(ស៊ីម៉ាក)ភាគខាងត្បូង នៅស្រុកកំពង់សីលា កាលពីព្រឹកថ្ងៃទី២២ ខែកក្កដា ឆ្នាំ២០២២ ថា ផ្ទៃដីដែលបានបោសសម្អាតមីន និងយុទ្ធភ័ណ្ឌរួចនេះ ជួយបង្កើនសេដ្ឋកិច្ចសង្គម ហើយអ្នកទេសចរលែងមានភាពភ័យខ្លាចពីគ្រាប់មីនទៀត ហើយប្រជាពលរដ្ឋ និងអ្នកទេសចរអាចដើរចូលព្រៃ ឡើងភ្នំ ក៏ដូចជាការទាក់ទាញអ្នកវិនិយោគ នៅលើទឹកដីសុវណ្ណភូមិរបស់យើង អាចបង្កើនការងារសម្រាប់យុវជនរបស់យើងនាពេលខាងមុខ។ បេសកកម្មបោសសម្អាតមីន និងយុទ្ធភ័ណ្ឌមិនទាន់ផ្ទុះ គឺជាការចូលរួមចំណែកលើកកម្ពស់ជីវភាពរស់នៅរបស់ប្រជាពលរដ្ឋ និងសេដ្ឋកិច្ចសង្គមថែមទៀត។រាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានយកចិត្តទុកដាក់ដោះស្រាយវិស័យមីន លុបបំបាត់គ្រាប់មីន និងយុទ្ធភ័ណ្ឌមិនទាន់ផ្ទុះដែលបានបង្កគ្រោះថ្នាក់ដល់ប្រជាពលរដ្ឋ និងដំណើរការសេដ្ឋកិច្ចសង្គមរបស់យើង។
តាមរបាយការណ៍របស់អង្គភាពបោសសម្អាតមីនភាគខាងត្បូងបានឱ្យដឹងថា ដំណើរការបាសសម្អាតមីនប្រកបដោយជោគជ័យ ដោយសារមានការគាំទ្រគម្រោងថវិកាពីរដ្ឋាភិបាលចិន។ ក្រុមការងារបោសសម្អាតមីន ដែលប្រតិបត្តិការក្នុងខេត្តព្រះសីហនុមានចំនួន៥ក្រុម មានបុគ្គលិកសរុប៣៦នាក់ ក្នុងនោះស្រី៤នាក់ ដែលបានចាប់ផ្ដើមប្រតិបត្តិការបោសសម្អាតមីនចាប់ពីថ្ងៃទី១ ខែមីនា ឆ្នាំ២០២២ នឹងបញ្ចប់ការបោះសម្អាតមីនទាំងស្រុង នៅត្រឹមដំណាច់ខែកក្កដាឆ្នាំ២០២២ខាងមុខ៕
ក្នុងឱកាសនោះដែរ ឯកឧត្តមអភិបាលខេត្ត ក៏បាននាំយកអំណោយរបស់សម្តេចតេជោឧបត្ថម្ភ ជូនបុគ្គលិកស៊ីម៉ាក មានដូចជា៖ អង្ករ៥បាវ ទឹកសុទ្ធ២០កេស មី១០កេស ត្រីខកំប៉ុង១០យួរ ស្រាបៀរ២០កេស និងថវិកា២លានរៀល ។ដោយឡែងបុគ្គលិកស៊ីម៉ាកទាំង៣៦នាក់ ក្នុងម្នាក់ៗទទួលបានថវិកាចំនួន២០ម៉ឺនរៀលផងដែរ៕
