រដ្ឋមន្រ្តីក្រសួងសុខាភិបាល បានអនុញ្ញាតឱ្យអនុរដ្ឋមន្ត្រីក្រសួងសុខាភិបាលទទួលបន្ទុកផ្នែកឱសថ និងបរិក្ខារពេទ្យនៃប្រទេសឥណ្ឌូនេស៊ី ចូលជួបសំដែងការគួរសម និងពិភាក្សាការងារមួយចំនួន
(ភ្នំពេញ)៖ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល នាព្រឹកថ្ងៃទី០៥ ខែឧសភា ឆ្នាំ២០២៣ បានអនុញ្ញាតឱ្យឯកឧត្តម ប៉ាហាឡា នូរាហា អនុរដ្ឋមន្ត្រីក្រសួងសុខាភិបាលទទួលបន្ទុកផ្នែកឱសថ និងបរិក្ខារពេទ្យនៃប្រទេសឥណ្ឌូនេស៊ី ចូលជួបសំដែងការគួរសម និងពិភាក្សាការងារមួយចំនួន នៅទីស្តីការក្រសួងសុខាភិបាល ។
ក្នុងជំនួបនេះ ឯកឧត្តមសាស្រ្តាចារ្យរដ្ឋមន្ត្រី បានថ្លែងអបអរសាទរ ដែលឥណ្ឌូនេស៊ី ធ្វើជាប្រធានអាស៊ានប្តូរវេន ក្នុងឆ្នាំ២០២៣ និងបានស្វាគមន៍យ៉ាងកក់ក្តៅក្នុងដំណើរអញ្ជើញទស្សនកិច្ចរយៈពេលខ្លី មកកាន់កម្ពុជារបស់ឯកឧត្តមអនុរដ្ឋមន្ត្រីសុខាភិបាលឥណ្ឌូនេស៊ី ជាពិសេសគឺការអញ្ជើញចូលរួមក្នុងព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ដែលកម្ពុជាធ្វើជាម្ចាស់ផ្ទះ ក្នុងឆ្នាំ២០២៣នេះ។
ជាមួយគ្នានោះនេះ ឯកឧត្តម ប៉ាហាឡា នូរាហា ក៏បានសុំអធ្យាស្រ័យ ឯកឧត្តមសាស្រ្តាចារ្យរដ្ឋមន្ត្រីផងដែរ ដែលបានផ្តល់ដំណឹងក្នុងរយៈពេលខ្លី សម្រាប់ការជួបសម្តែងការគួរសមនេះ។ សមភាគីឥណ្ឌូនេស៊ី បានស្នើសុំពង្រឹង និងពង្រីកលើវិស័យសុខាភិបាលបន្ថែមទៀត ជាពិសេសលើវិស័យឱសថ៕
