ព័ត៌មានជាតិ

អាជ្ញាធរស្រុកខ្សាច់កណ្តាល បញ្ជូនសុំណុំរឿង​ករណីវិវាងដីធ្លី​ រវាងបងប្អូន​ចិញ្ចឹម ទៅរដ្ឋបាលខេត្ត​កណ្តាល ដោះស្រា​យបន្តដើម្បីបញ្ចប់វិវាទ ក្រោយពីព្យាយាមដោះស្រាយជា​ច្រើន​លើកច្រើ​នសារ មិនអាចដោះស្រាយ​បាន

ខេត្តកណ្តាល៖បើទោះបីជាអាជ្ញាធរឃុំ អាជ្ញាធរស្រុក ព្យាយាមដោះស្រាយ​ជាច្រើន​លើកច្រើន​សារយ៉ា​ងណាក៏ដោយ នៅ​​តែមិនអាច​ដោះស្រាយសម្របសម្រួលបាន ទើបអាជ្ញា​ធរស្រុកបញ្ជូ​នករណីវិវាងរ​វាង​បងប្អូនចិញ្ចឹមទៅរដ្ឋបាលខេត្តកណ្តាលដោះស្រាយបន្ត ដើម្បីអាចបញ្ចប់វិវាទនេះ។

វិវាទបងប្អូន​ចិញ្ចឹមរស់នៅជា​មួយគ្នានេះ ត្រូវបា​នលោកស្រី ប្រាំង ​​សារ៉េន (ហៅ កង សារ៉េន) អាយុ៥​៩ឆ្នាំ រស់នៅ​ភូមិលើ ឃុំស្វា​យជ្រំ ស្រុកខ្សាច់កណ្តាល ខេត្តកណ្តាល បានរៀបរា​ប់ប្រាប់​អ្នកសារព័​ត៌មានយើងឲ្យដឹងថា លោកស្រីបា​នរស់​នៅជាមួយលោក​យាយ ប្រាំង យិន តាំងពីឆ្នាំ១៩៨៣ ដែល​មា​នលោកស្រី ប្រាំង ចំរើន អាយុជាង៦០ឆ្នាំ និងឈ្មោះ ជ័យ រដ្ឋា ជាកូនរបស់លោកស្រី ប្រាំង ចំ​រើន។ ក្រោយមកនៅក្នុងឆ្នាំ១៩៨៥១៩៨៦ រដ្ឋអំណាច ដែលមានលោកតា យឹម យ៉ន អាយុ៨២ឆ្នាំ ជាប្រ​ធានក្រុមទី៧ ដែលមានសមាជិកក្រុមចំនួន១២គ្រួសារ បានធ្វើការចែកដីមួយកន្លែងនៅភូមិលើ ឃុំស្វាយជ្រំ ស្រុកខ្សាច់កណ្តាល ខេត្តកណ្តាល ទៅឲ្យគ្រួសារលោកយាយ ប្រាំង យិន ដែល​​មានស​មា​ជិកបួននាក់នៅក្នុងគ្រួសារ ដោយទទួលបានចំណែកស្មើៗគ្នា ដោយឈ្មោះ ប្រាំង យិន ,ប្រាំង សារ៉េន, ប្រាំង ចំរើន និង ឈ្មោះ ជ័យ រដ្ឋា ជាកូនរបស់លោកស្រី ប្រាំង ចំរើន ក៏មានចំ​ណែកនៅ​ក្នុងនោះដែរ។ ហើយការរស់នៅជុំគ្នានោះក៏មានសៀវភៅគ្រួសារជាមួយគ្នាផងដែរ។

 

សូមរំលឹកបន្ថែមថា កាលពីលោកយាយ ប្រាំង យិន នៅមានព្រះជន្ម គឺលោកយាយ​បានលក់​ដីមួ​យក​ន្លែងដែរ ហើយបានធ្វើ​ការបែងចែ​កជាបួនចំណែក ក្នុងនោះ​ក៏មានចំណែករបស់លោកស្រី ប្រាំង សារ៉េន ឬ កង សារ៉េន ផងដែរ។​ហើយនៅ​ក្នុងឆ្នាំ២០១៦ ​លោកស្រី ប្រាំង សារ៉េន ក៏បានប្តឹ​ងទាមទា​រដីដែលជា​ចំណែ​ករបស់ខ្លួនដែរ តែលោកស្រី ប្រាំង ចំរើន មិនព្រមប្រគល់ឲ្យមកលោកស្រីទេ។

ក្រោយមក​នៅក្នុងឆ្នាំ២០២០ លោកយាយ ប្រាំង យិន បានធ្វើមរណៈកាលទៅ លោកស្រី ប្រាំង សារ៉េ​​ន ឬ កង សារ៉េន ក៏បានធ្វើការប្តឹងបន្តទៀតទៅសាលាឃុំ តាំងពីលោក ស៊ុន សំបូរ នៅជាមេឃុំ ហើយសម្របសម្រួលមិនបាន ឃុំក៏បានបញ្ជូនក​រណីវិវាទទៅសា​លាស្រុកខ្សាច់កណ្តាល​តាំងពី​លោក ប៊ុន ​ផេង នៅជា​អភិបាលស្រុក ហើយក៏មានលិខិត​កោះអញ្ជើញភាគីទាំ​ងពីរដោះស្រាយ​សម្របសម្រួលចំនួន​៣លើកមកហើយ ដោយលើកទី១នៅថ្ងៃទី២២ ខែតុលា ឆ្នាំ២០២១ ក្រោមការ​សម្របសម្រួលរបស់លោក អែតដា ដូរ៉ាមី អភិបាលរងស្រុក លើកទី២នៅថ្ងៃទី១០ ខែមីនា ឆ្នាំ២០​២២ ក្រោមការសម្របសម្រួលរបស់លោក អែតដា ដូរ៉ាមី ហើយលើកទី៣ នៅថ្ងៃទី៣០ ខែវិច្ឆិកា ឆ្នាំ២០២២ ក្រោមការសម្របសម្រួល ដោយលោក ហ៊ុន សុខគីម អនុប្រធានការិយាល័យនីតិកម្ម និងសម្រុះ​សម្រួលវិវាទមូល​ដ្ឋាន នៅតែមិនអា​ចសម្របសម្រួល រវាងភាគីទាំងពីរនេះបាន ទើបរដ្ឋបា​លស្រុកបានបញ្ជូនករណីនេះទៅរដ្ឋបាលខេត្តធ្វើការដោះស្រាយសម្របសម្រួល និងសម្រេ​ចលើករណីនេះ។

សូមបញ្ជាក់​ថា ចំពោះ​វិវាទរវាងបងប្អូនចិ​ញ្ចឹមនេះ មានសា​ក្សីជាច្រើនបាន​បញ្ជាក់ថា លោកស្រី ប្រាំង ​សារ៉េន ឬ កង ​សារ៉េន គឺពិ​តជា​មាន​ដីមួយ​ចំណែក ក្នុងបួនចំណែកនេះពិ​តប្រាកដមែន និង​មានកា​របញ្ជាក់​ថា លោកស្រី ប្រាំង សា​រ៉េន ពិតជាបា​នរស់នៅ​ជាមួយលោកយា​យ ប្រាំង យិន ពិត​ប្រាកដមែន។

សាក្សីដែ​លបានបញ្ជាក់ថា​ លោកស្រី ប្រាំង ​សារ៉េន មានដីនោះគឺមាន ១.លោកតា យឹម យ៉ន អាយុ​៨២ឆ្នាំ ជាអតីតប្រធានក្រុម ទី២.លោកស្រី នីន រុំ, ទី៣ លោកស្រី ញឹល សុខហេង ទី៤ លោក ភិន កឿន, ទី៥ លោកស្រី នៅ ឃី,ទី៦ លោក ប៉ុន ខុន,ទី៧ លោកស្រី មិ ពៅ,ទី៨ លោកស្រី ប្រុស តូ,ទី៩ លោកស្រី កៅ ថន គាត់ទាំងអស់គ្នាសុទ្ធតែជាកូនក្រុមនៅក្នុងក្រុមទី៧។ ចំណែក​ការដែលបញ្ចាក់ថា លោកស្រី ប្រាំង សារ៉េន ឬ កង សារ៉េន ពិតជាបានរស់នៅជាមួយលោកយាយ ប្រាំង យិន គឺមាន​លោក រស់ តារា មេភូមិលើ និង លោក ប៊ុន បាន មេឃុំស្វាយជ្រំ ក៏បានបានបញ្ជាក់ផងដែរ។

ចំពោះក​រណីនេះលោកស្រី ប្រាំង សារ៉េន ព្រមទាំងក្រុមគ្រួសារក៏បានស្នើសុំទៅឯកឧត្តម គង់ សោភ័ណ្ឌ អភិ​បាលនៃគណៈអភិបាលខេត្ត​កណ្តាល មេត្តាជួយដោះស្រាយ​សម្របសម្រួល​ដើម្បី​ឲ្យរូប​លោកស្រីបានគ្រប់គ្រងអាស្រ័យផលលើដីរបស់លោកស្រីផង។

ក្នុងករណី​នេះមានកា​រលើកឡើងថាគឺជា​សមត្ថកិច្ចរបស់រដ្ឋបាលខេត្តជាអ្នកដោះស្រាយ ហើយ​ពិតជា​អាចដោះស្រាយបាន ព្រោះដីនេះគឺជាដីមិនទាន់មានប័ណ្ណ បើទោះជាភាគីទាំងពីរ ឬភាគីណា​មួយ​ប្តឹងករណីនេះទៅតុលាការ ក៏តុលាកា​របង្វិលករណីនេះ​ជូនខេត្តដើម្បីធ្វើការ​ដោះស្រាយវិញដ​ដែល​នោះទេ។

ចំពោះករណីនេះបើតាមប្រភពផ្សេងទៀតបានឲ្យដឹងថា ការដែលភាគីលោកស្រី ប្រាំង ចំរើន មិន ព្រមប្រគល់ដីឲ្យ​លោកស្រី ប្រាំង សារ៉េន ជាប្អូនចិញ្ចឹម និងមិនព្រមស្តាប់ការស​ម្របសម្រួលរបស់​អាជ្ញាធរឃុំ​ ស្រុក គឺដោយ​សារមានអ្នក​មានខ្សែបណ្តាញ នៅសាលាខេត្ត និងនៅតុលាការទើប​ពួកគេមិនខ្វល់​ពីការដោះ​ស្រាយសម្របសម្រួលកន្លងមក។ ចំពោះប្រភពថា​មានអ្នកនៅពីក្រោយ​នេះភ្នាក់ងាររបស់យើងនៅទាន់ដឹងជាអ្នកណា ហើយមានតួនាទីអ្វីនោះ? ហើយភ្នាក់ងាររប​ស់យើងនឹងរងចាំតាមដានបន្ត និងរងចាំការបំភ្លឺពីអ្នកពាក់ព័ន្ធរៀងរាល់ម៉ោងធ្វើការ៕

Leave a Reply

Your email address will not be published.