ខេត្តកែប៖ឯកឧត្តមបណ្ឌិត សោម ពិសិដ្ឋ អភិបាល នៃគណ:អភិបាលខេត្តកែប កាលពីរសៀលថ្ងៃទី០៧ ខែកញ្ញា ឆ្នាំ២០២២ បានអញ្ជើញជាអធិបតីក្នុងកិច្ចប្រជុំផ្សព្វផ្សាយសេចក្ដីណែនាំ ស្ដីពី បែបបទ និងនីតិវិធីនៃការផ្ដល់សេវារដ្ឋបាលតាមយន្តការច្រកចេញចូលតែមួយនៃរដ្ឋបាលឃុំ សង្កាត់។
កិច្ចប្រជុំនេះបានធ្វើឡើងនៅសាលប្រជុំសាលាខេត្តកែប ដោយមានការចូលរួមពីសំណាក លោកនាយករដ្ឋបាលសាលាខេត្ត នាយកនាយករងទីចាត់ការ–អង្គភាពចំណុះរដ្ឋបាលខេត្ត តំណាងកងកម្លាំងទាំងបី មន្ទីរអង្គភាពជុំវិញខេត្ត រដ្ឋបាលក្រុង ស្រុក និងតំណាងរដ្ឋបាលឃុំ–សង្កាត់ សរុប ៩៤រូបផងដែរ។
រដ្ឋបាលខេត្តបញ្ជាក់ថា គោលបំណងនៃការរៀបចំកិច្ចប្រជុំនេះគឺដើម្បីធ្វើការផ្សព្វផ្សាយនូវខ្លឹមសារសំខាន់ៗ ដែលបានកំណត់នៅក្នុងសេចក្ដីណែនាំលេខ០១៨ សណន ចុះថ្ងៃទី១៣ ខែឧសភា ឆ្នាំ២០២២ ជូនដល់ថ្នាក់ដឹកនាំ និងមន្រ្តីពាក់ព័ន្ធដើម្បីត្រៀមខ្លួនអនុវត្តក្នុងដែនសមត្ថកិច្ចរបស់ខ្លួន អំពីរបបនៃការរៀបចំយន្តការច្រកចេញចូលតែមួយនៅរដ្ឋបាលឃុំ សង្កាត់នីមួយៗ សំដៅដាក់ដំណើរការយន្តការនេះអោយបានឆាប់រហ័ស។
មានប្រសាសន៍ក្នុងកិច្ចប្រជុំផ្សព្វផ្សាយនាឱកាសនោះ ឯកឧត្តមបណ្ឌិត អភិបាលខេត្ត បានផ្ដល់អនុសាសន៍នូវចំនុចសំខាន់ៗ សម្រាប់ការរៀបចំដាក់ចេញនៅសេចក្ដីណែនាំលេខ០១៨ សណន ចុះថ្ងៃទី១៣ ខែ ឧសភាឆ្នាំ២០២២ ស្ដីពីបែបបទ និងនីតីវិធីនៃការផ្ដល់សេវាច្រកចេញចូលតែមួយនៃរដ្ឋបាល ឃុំ សង្កាត់ផងដែរ៕
