ខេត្តប៉ៃលិន៖ក្រោយពីមានភ្លៀងធ្លាក់បង្កជាទឹកជំនន់ បណ្តាលឲ្យផ្ទះប្រជាពលរដ្ឋមួយចំនួនរងលិចលង់នោះ កាលពីល្ងាចថ្ងៃទី១២ ខែសីហា ឆ្នាំ២០២២ លោកជំទាវ បាន ស្រីមុំ អភិបាល នៃគណៈអភិបាលខេត្តប៉ៃលិន និងឯកឧត្តម សៅ សារ៉ាត់ អ្នកតំណាងរាស្ត្រមណ្ឌលប៉ៃលិន អមដំណើរដោយក្រុមការងារ និងមន្ទីរអង្គភាពជំនាញពាក់ព័ន្ធ ព្រមទាំងអាជ្ញាធរមូលដ្ឋាន អញ្ជើញចុះពិនិត្យស្ថានភាពជំនន់ទឹកភ្លៀង និងផលប៉ះពាល់ ស្ថិតនៅក្នុងឃុំសាលាក្រៅ និងឃុំស្ទឹងត្រង់ ស្រុកសាលាក្រៅ ដែលរងគ្រោះដោយសារជំនន់ទឹកភ្លៀង។
សូមបញ្ជាក់ផងដែរថា កាលពីរសៀលថ្ងៃទី១១ ខែសីហា ឆ្នាំ២០២២ ភ្លៀងធ្លាក់យ៉ាងច្រើននៅផ្នែកខាងលើជាប់ព្រំដែនថៃ បង្កជាទឹកជំនន់ហូរតាមស្ទឹងបរយ៉ាខា បណ្តាលឲ្យលិចលង់លំនៅឋាននិងខ្ចុះរបស់ប្រជាពលរដ្ឋអស់មួយចំនួននៅសង្កាត់បរយ៉ាខា ក្រុងប៉ៃលិន ហើយទឹកបន្តហូរចាក់សំដៅទៅលិចភូមិមួយចំនួននៅឃុំស្ទឹងត្រង់ ស្រុកសាលាក្រៅ ខេត្តប៉ៃលិន តែមិនមានផលប៉ះពាល់ទ្រព្យសម្បតិ្តពលរដ្ឋធ្ងន់ធ្ងរទេ ព្រោះមានការជួយអន្តរាគមន៍ពីអាជ្ញាធរ និងសមត្ថកិច្ចទាន់ពេលវេលា៕
