(ភ្នំពេញ)៖ បន្ទប់ផ្តល់សេវាកម្មលែងថ្នាំញៀន(ថ្នាំគ្រវី) តុបៀរបាការ៉ាត់ ជាច្រើនតុ រួមទាំងទូរបាញ់ត្រី និងស្លុតម៉ាស៊ីន ជាច្រើនគ្រឿង កំពុងតែបើកទទួលភ្លៀវទាំងថ្ងៃទាំងយប់ នៅជាន់ខាងលើក្នុងផ្សារបឹងត្របែកផ្លាហ្សា ដែលស្ថិតនៅក្នុងសង្កាត់ បឹងត្របែក ខណ្ឌចំការមន រាជធានីភ្នំពេញ។
ទីតាំងផ្សារ តែបង្កប់ល្បែងស៊ីសងនេះ ត្រូវបានប្រជាពលរដ្ឋដឹងថា បានបើកដំណើរការជាយូរមកហើយ មិនដែលមានមន្ត្រីមូលដ្ឋាន ឬមន្ត្រីជំនាញចុះទៅធ្វើការបង្រាបនោះទេ។ បើទោះបីជាកន្លងមក អ្នកសារព័ត៌មាន បានធ្វើការផ្សព្វផ្សាយពីទីតាំងនេះ និងបានរាយការណ៍ជូន លោក យិន សាន អធិការខណ្ឌចំការមន និងលោក កៀង ល័ក្ស អភិបាលខណ្ឌចំការមន ដើម្បីឲ្យចុះធ្វើការបង្រាប តែលោកទាំងពីរមិនខ្វល់នោះទេ។
ក្នុងផ្សារតែអាចបើកល្បែងស៊ីសង មានបន្ទប់ទទួលសេវាកម្មថ្នាំញៀន(ថ្នាំក្រវី) បានដូច្នេះ ត្រូវបានគេដឹងយ៉ាងច្បាស់ថា បើមិនមានការអនុញ្ញាត ពីប្រធានផ្សារបឹងត្របឹងផ្លាហ្សានេះទេ គឺពិតជាមិនអាច បើកដំណើរការបាននោះឡើយ។
ជុំវិញទីតាំងល្មើសច្បាប់ក្នុងផ្សារនេះ ប្រជាពលរដ្ឋធ្វើការសំណូមពរទៅឯកឧត្តម ជួន ណារិន្ទ ស្នងការនគរបាលរាជធានីភ្នំពេញ និងឯកឧត្តម ឃួង ស្រេង អភិបាលរាជធានីភ្នំពេញ រួមទាំងមន្ត្រីជំនាញ មេត្តាជួយមានវិធានការក្នុងការបង្ក្រាប ដើម្បីចូលរួមលុបបំបាត់ទបល្មើសផ្សេងៗ។
សូមបញ្ជាក់ផងដែរថានៅថ្ងៃទី១៩ ខែកញ្ញា ឆ្នាំ២០២៣នេះ ឯកឧត្តម ឃួង ស្រេង អភិបាលរាជធានីភ្នំពេញបានបើកការប្រជុំជាមួយនឹងអាជ្ញាធរដែលពាក់ព័ន្ធ ត្រូវជំរុញនិងលុបបំបាត់ឱ្យអស់រាល់ល្បែងស៊ីសងខុសច្បាប់គ្រប់ប្រភេទក្នុងមូលដ្ឋានផងដែ៕
