ឃាត់ខ្លួនជនសង្ស័យ០២នាក់ នៅខណ្ឌឫស្សីកែវ ពាក់ព័ន្ធករណីឆក់ទូរស័ព្ទដៃពីនារីរងគ្រោះដែលកំពុងតែជិះកង់បីឥណ្ឌា
(ភ្នំពេញ)៖ចោរឆក់សកម្មនៅរាជធានីភ្នំពេញ ត្រូវសមត្ថកិច្ចចាប់ឃាត់ខ្លួនបានចំនួន២នាក់ នៅថ្ងៃទី១០ ខែឧសភា ឆ្នាំ២០២៣ វេលាម៉ោង២២និង០៥នាទី ខណៈដែលកម្លាំងចុះល្បាត។
សមត្ថកិច្ចបញ្ជាក់ថា មុននឹងឈានដល់ការឃាត់ខ្លួនជនសង្ស័យទាំង២នាក់នេះ កម្លាំងការិយាល័យព្រហ្មទណ្ឌកម្រិតស្រាល នៃនាយកដ្ឋាននគរបាលព្រហ្មទណ្ឌ ដែលមានលោកវរសេនីយ៍ឯក ឡេង ប៊ុនហួរ ជានាយការិយាល័យ ដឹកនាំដោយលោកឧត្តមសេនីយ៍ត្រី ប៊ុត វណ្ណារដ្ឋ ដោយមានការចូលរួមសហការពីលោកវរសេនីយ៍ទោ ប៊ុត ស៊ីម៉េង បានចុះល្បាតតាមបណ្តោយផ្លូវ លេខ៧០ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ក៏ប្រទះឃើញជនសង្ស័យជិះម៉ូតូចំនួន១គ្រឿង មានគ្នាចំនួន២នាក់ បានធ្វើសកម្មភាពឆក់ទូរស័ព្ទដៃពីនារីរងគ្រោះដែលកំពុងតែជិះកង់បីឥណ្ឌា តែមិនបានសម្រេច។
ភ្លាមនោះកម្លាំងជំនាញការិយាល័យធ្វើការប្រដេញ ឃាត់ខ្លួនជនសង្ស័យបានទាំង០២នាក់ នៅចំណុចផ្លូវលេខ៩៣ សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ និងដកហូតម៉ូតូ១គ្រឿងម៉ាក Suzuki let’s ពណ៌ស។ បច្ចុប្បន្នកម្លាំងជំនាញបាននាំជនសង្ស័យខាងលើមកកាន់ការិយាល័យ ដើម្បីធ្វើការសាកសួរ និងកសាងសំណុំរឿងចាត់ការតាមនីតិវិធី៕
